Franca yera muyer
Darío Fo algamó'l Nobel, pero yera ensin dulda un premiu "d'equipu". Franca Rame lleva casada col autor dende 1954 y lo so collaboración como autora, intérprete, y, en definitiva, collacia en trabayu y na vida faila merecedora del 50 per cientu del premiu. Muncho llucharon y lluchen col so trabayu intelectual escontra'l facismu na so bella Italia. Una llucha valiente, diciendo les coses ensin reparu, xugándosela. Darío foi censuráu por ello. A Franca un grupu de neofacistes conectaos cola policía metióla nun furgón; ellí, torturáronla y violáronla ente toos. Yera'l añu 1973. Sábese que nos cuarteles munchos carabinieri brindaron pola "fazaña".Darío diz tar asqueáu porque naide pagó nunca por ello; la sentencia tardó 25 años, y entós yá taba prescritu'l crime. Biago Pitarresi, Angelo Angeli, un tal Patrizio y un tal Muller son responsables. Yera un castigu a la pareya, pero sobre too a Franca porque yera d'izquierdas y porque yera muyer.
Esbilla
del.icio.us
Arrasen les nueves tecnoloxíes y hasta nelles los estereotipos se cuelen. Avancen les videoconsoles pero la sociedá sigue a pasu tortuga. Esti ye'l xuegu que-yos traxeron los Reis Magos a munches neñes esti añu: "Imaxina ser mamá". Nun hai versión "Imaxina ser papá", por aquello de que xugar col muñecu ye cosa de mariquites hasta na realidá virtual. Dende la infancia tócanos deprender el nuesu papel na sociedá. ¡Putos Reis Magos! ¡Por dalgo soi republicana!
Amnistía Internacional acusó fai poco al sistema de xusticia penal del norte d'Uganda d'inorar, negar y consentir tácitamente la violencia escontra les muyeres y les neñes protexendo a los agresores.
Lumi yera llampistera. Col so nome, Iluminada, nun ye d'estrañar que se dedicare a eso d'ocupase de la lluz. Foi una de les primeres muyeres n'entrar na mina nes últimes décades del sieglu XX. Enantes hubo munches que diben a la pala; que cargaben vagonetes o rebuscaben na escombrera y de les que naide s'alcuerda. Nes mines d'Inglaterra les muyeres usábense pa entrar onde nun cabía'l burru, por exemplu. Lumi foi la primera minera en prexubilase. Fíce-y una entrevista fai un par d'años y deprendí delles coses gracies a ella. Fai un mes el so corazón dexó tamién de trabayar enantes de tiempu. De xuru que ta col dios de la mina Plutón, como tolos mineros y mineres, ocupándose de la lluz, que, cuando caen rellámpagos y truena, fai que nos alcordemos de Santa Bárbara.
Esti anuncio nel que baxu'l lema "Tan de muerte" se publicitaben zapatos nos pies del supuestu calabre d'una muyer, foi retiráu de Guatemala tres recibir delles denuncies por ofensivu, macabru y, sobre too, por paecer insultante nun país onde un promediu de 440 muyeres muerren de forma violenta al añu. A mí fáiseme interesante un análisis dende la valoración del zapatu de muyer como fetiche y la so relación nesti anunciu cola tradición de la sensualidá de les muyeres inertes nel sieglu XIX. Recomiendo la llectura del llibru Ídolos de perversidad del profesor Bram Dijkstra, mui revelador nestos temes. Si dalguién nun sabe qué regalame nes fiestes que lu apunte. Tengo gastáu'l de la biblioteca...
Machismu: conxuntu d'actitúes, praútiques sociales y creencies destinaes a xustificar y promover el mantenimientu de la discriminación sexista (basada nel sexu biolóxicu).
