Una fábula francesa pervieya, fala d'un rapaz bobu y un poco manguán que nun sabía lo que yera'l sexu d'una muyer. Preguntó-y a la so moza y ella, fartuca d'aguantalu y por quitalu de delantre, díxo-y que nun lu tenía ellí, que lu olvidara na so casa. El rapazón, preocupáu, foi a la casa la razapa y preguntó-y inquietu a la madre d'ella. La suegra, entendiendo la burla, dio-y una cestina na qu'había un coneyín encamentando que lu cuidara, qu'ellí lu tenía. A metá'l camín, el coneyu pegó un saltu y escapó. Atristayáu, el rapaz buscó a la moza y llamentóse: perdí'l to sexu, soi un desgraciáu. Ella rio y contestó llevantando la enagua: nun te preocupes, equí ta. Y el mozu, mui contentu, dixo: nun faigas ruíu, vamos dexalu descansar, ya fairemos l'amor mañana.

 Darío Fo algamó'l Nobel, pero yera ensin dulda un premiu "d'equipu". Franca Rame lleva casada col autor dende 1954 y lo so collaboración como autora, intérprete, y, en definitiva, collacia en trabayu y na vida faila merecedora del 50 per cientu del premiu. Muncho llucharon y lluchen col so trabayu intelectual escontra'l facismu na so bella Italia. Una llucha valiente, diciendo les coses ensin reparu, xugándosela. Darío foi censuráu por ello. A Franca un grupu de neofacistes conectaos cola policía metióla nun furgón; ellí, torturáronla y violáronla ente toos. Yera'l añu 1973. Sábese que nos cuarteles munchos carabinieri brindaron pola "fazaña".Darío diz tar asqueáu porque naide pagó nunca por ello; la sentencia tardó 25 años, y entós yá taba prescritu'l crime. Biago Pitarresi, Angelo Angeli, un tal Patrizio y un tal Muller son responsables. Yera un castigu a la pareya, pero sobre too a Franca porque yera d'izquierdas y porque yera muyer.

 Arrasen les nueves tecnoloxíes y hasta nelles los estereotipos se cuelen. Avancen les videoconsoles pero la sociedá sigue a pasu tortuga. Esti ye'l xuegu que-yos traxeron los Reis Magos a munches neñes esti añu: "Imaxina ser mamá". Nun hai versión "Imaxina ser papá", por aquello de que xugar col muñecu ye cosa de mariquites hasta na realidá virtual. Dende la infancia tócanos deprender el nuesu papel na sociedá. ¡Putos Reis Magos! ¡Por dalgo soi republicana!

 Diferencies ente les imáxenes:

1. Na d'arriba sal una pareya heterosexual y na d'embaxo una pareya homosexual.

2. La primera pudo vese en televisiones, publicidá urbana, revistes,...la segunda foi retirada en Francia por paecer demasiao explícita.

 A vegaes (munches vegaes) dame vergoña pertenecer a esta sociedá pretendidamente civilizada onde imperen los prexuicios. Colo guapo que ye estazase...

 Vamos entamar bien l'añu con una canción de Pedro Guerra interpretada por Silvio y el propiu autor. Nun dexar de facevos con ella y escuchala, llámase «Niña» y andando estos dos pol mediu daqué bueno tenía que salir.

Quizá te busquen
porque naciste,
quizá te midan por mujer,
quizá te acosen
porque creciste,
quizá te odien por mujer,

pero no dejes
de ser la niña
que abraza
todo lo que hay en si,
pero no dejes de ver el mundo
como un espacio por compartir.

Amnistía Internacional acusó fai poco al sistema de xusticia penal del norte d'Uganda d'inorar, negar y consentir tácitamente la violencia escontra les muyeres y les neñes protexendo a los agresores.

La organización espublizó un informe nel que detalla casos individuales d'abusu sexual escontra muyeres y neñes nel norte d'Uganda. Les formes de violencia escontra les muyeres documentaes pol equipu d'investigación d'Amnistía Internacional incluyen agresiones, violaciones y abusos sexuales a menores, particularmente nos campos pa persones internamente desplazaes, nos que sigue viviendo la mayoría de la población del norte d'Uganda